२२ फागुन २०८१, काठमाडौं – सामान्य प्रशासन मन्त्रालयले सरोजप्रसाद गुरागाईंलाई काठमाडौं महानगरपालिकामा पुनर्बहाली गरी काम गर्ने वातावरण बनाउन आग्रह गरेको छ। मन्त्रालयले महानगरपालिकालाई पठाएको पत्रमा मन्त्रिपरिषद्को निर्णयअनुसार गुरागाईंलाई पुनः हाजिरी गराई काम दिनुपर्ने उल्लेख गरिएको छ।
तर, काठमाडौं महानगरपालिकाले प्रमुख स्तरीय निर्णयका आधारमा गुरागाईंलाई हाजिरी गराई काम दिन नसकिने जनाउँदै यसको कानुनी जटिलता उत्पन्न हुन सक्ने बताएको छ। यसबारे मन्त्रालय र महानगरबीच पत्राचार भइरहेको छ।
सामान्य प्रशासन मन्त्रालयको पत्रमा कानुनी आधार र मन्त्रिपरिषद्को निर्णयलाई टेकेर गुरागाईंलाई पुनर्बहाली गर्न निर्देशन दिइएको भए पनि महानगरले आन्तरिक निर्णयलाई कारण देखाएर उनलाई काममा फर्काउन असमर्थता जनाएको हो।
यस प्रकरणले थप कानुनी जटिलता निम्त्याउने देखिएको छ। यदि मन्त्रालयको निर्देशन पालना नगर्ने हो भने यसले प्रशासनिक र कानुनी प्रक्रियामा अन्योलता सृजना गर्न सक्ने विज्ञहरुको भनाइ छ।
