झापा, असोज २६ । हालै आएको अविरल वर्षासँगै आएको बाढीले क्षति पुर्याएका झापा गाउँपालिका–२ माइ कन्काई माइका बाढीपीडित घरपरिवारलाई करिब १८ लाख रुपैयाँ बराबरको खाद्यान्न तथा अत्यावश्यक सामग्री वितरण गरिएको छ।
Rapid Emergency Assistance for Crisis affected Households Flood Response (REACH ) नामक परियोजना अन्तर्गत राहत वितरण कार्यक्रम सम्पन्न गरिएको हो। उक्त कार्यक्रमको आयोजना KIRDARC Nepal को सहकार्यमा Start Fund (Start Network), UK International Development लगायतका संस्थाहरूको सहयोगमा गरिएको हो।
राहत वितरण कार्यक्रम असोज २५ गते झापा गाउँपालिकाको टायनडुब्बा क्षेत्रमा सम्पन्न भएको हो। कार्यक्रममा स्थानीय जनप्रतिनिधि कार्यवाहक पालिका अध्यक्ष अन्जु देबी थपलिया प्रमुख प्रसासकिय जनार्जन निरौला वडा नम्बर २ का वडा अध्यक्ष हिमल कुमार चौलागाइ ,पालिकाका कर्मचारी ,नेपाली सेना नेपाल ,प्रहरी सशस्त्र प्रहरी ,रेडक्रस लगायत सरोकारवाला निकायका प्रतिनिधि, स्वयंसेवक तथा स्थानीय समुदायको सहभागिता भएको थियो थियो।
कार्यक्रमका क्रममा बाढीले घरबार गुमाएका, अन्नपात नष्ट भएका तथा दैनिक उपभोग्य वस्तु अभावमा परेका परिवारहरूलाई चामल, दाल, नुन, तेल, साबुन, सरसफाइ सामग्री लगायतका खाद्य तथा गैरखाद्य सामग्री ५०० घर परीवारलाइ वितरण गरिएको हो।
बाढीपछि धेरै परिवार अस्थायी टहरामा बस्न बाध्य भएका छन्। राहत प्राप्त गरेपछि स्थानीयवासीहरूले राहत सहयोगप्रति कृतज्ञता व्यक्त गर्दै तत्कालीन जीवनयापनमा केही सहजता पुगेको बताएका छन्।
कार्यक्रमका आयोजक KIRDARC Nepal का प्रतिनिधिले बाढीजस्ता प्राकृतिक विपद्मा प्रभावित समुदायसम्म शीघ्र राहत पुर्याउनु आफ्नो प्रमुख उद्देश्य रहेको उल्लेख गर्दै आगामी दिनमा पनि यस्ता समुदायमूलक सहयोगका कार्यक्रम निरन्तर सञ्चालन गर्ने प्रतिबद्धता जनाए।
सो कार्यक्रममा झापा गाउँपालिकाका जनप्रतिनिधिहरूले राहत सामग्री वितरणले पीडितहरूलाई केही हदसम्म राहत पुगेको बताउँदै, दीर्घकालीन समाधानका लागि स्थायी बासस्थान, रोजगार र पूर्वाधार पुनर्निर्माणमा ध्यान दिनुपर्नेमा जोड दिए।
बाढीका कारण माइ कन्काई माइ क्षेत्रका बस्तीहरूमा कृषिजन्य सम्पत्ति, आवास, सडक र खानेपानीका संरचनामा ठूलो क्षति पुगेको स्थानीय प्रशासनले जनाएको छ। राहत वितरणले तत्कालका लागि प्रभावित परिवारहरूलाई खाद्यान्न अभाव नहोस् भन्ने उद्देश्य पूरा गरेको बताइएको छ।
