झापा बिर्तामोड असोज २३/
नेपालले टस हारेर पहिले ब्याटिङ गर्दै निर्धारित २० ओभरमा ६ विकेट गुमाएर १४१ रनको लक्ष्य प्रस्तुत गर्यो।
कुवेतले जवाफमा १८.१ ओभरमा ८३ रनमा अलआउट हुँदै ५८ रनले हार व्यहोर्नुपर्यो।
नेपालका लागि कुशल भुर्तेलले ६६ रनको अर्धशतकीय इनिङ्स खेले भने बलिङतर्फ रोहित, सन्दीप, ललितले २-२ विकेट लिए।
आईसीसी टी-२० विश्वकपको एसिया तथा इस्ट एसिया प्यासिफिक (इएपी) छनोट खेलमा नेपालले विजयी सुरुवात गरेको छ। बुधबार भएको खेलमा नेपालले कुवेतलाई ५८ रनले पराजित गर्दै प्रतियोगितामा विजयी सुरुवात गरेको हो।
टस हारेर पहिले ब्याटिङ गरेको नेपालले निर्धारित २० ओभरमा १ सय ४१ रनको लक्ष्य प्रस्तुत गरेको थियो। जवाफमा कुवेत १८.१ ओभरमा ८३ रनमा अलआउट भयो। उसका लागि ओपनर क्लिन्टोन एन्टोले २६ रन बनाउनु सर्वाधिक रह्यो। उनी बाहेक यसिन पटेलले १९ र मिट भावसरले ११ रन बनाए। अन्य खेलाडीले भने दोहोरो स्कोरमा रन बनाउन सकेनन्।
नेपालका लागि रोहित पौडेल, सन्दीप लामिछाने र ललित राजवंशीले २-२ विकेट लिंदा सोमपाल कामी, नन्दन यादव र कुशल भुर्तेलले १-१ विकेट लिए।
त्यसअघि पहिले ब्याटिङ गरेको नेपालले निर्धारित २० ओभरमा ६ विकेट गुमाएर १ सय ४१ रन बनाएको थियो। नेपालका लागि कुशल भुर्तेलले सर्वाधिक ६६ रनको अर्धशतकीय इनिङ खेले। उनले ५६ बलमा ३ चौका र ३ छक्का प्रहार गर्दा कप्तान रोहित पौडेलले १६ रन बनाए। त्यस्तै दिपेन्द्र सिंह ऐरी र गुल्सन झाले २०-२० रन बनाए।
ओमान क्रिकेट एकेडेमी १ मा भएको खेलमा नेपाल विरुद्ध कुवेतका नभिनरजा राजेन्द्रन र अनुदिप चेनथामरनले समान २-२ विकेट लिंदा मोहम्मद अकिफ र मोहम्मद अस्लामले १-१ विकेट लिएका थिए।
