नेपालको राजनीतिक रङ्गमञ्चमा एक अभूतपूर्व मोडमा पूर्वराष्ट्रपति विद्यादेवी भण्डारीले आफ्नो राजनीतिक पुनरागमनको उद्देश्य नेकपा एमालेको नेतृत्व सम्हाल्नु नै रहेको खुलासा गरेकी छन् ।
शीतल निवासको सम्मानित आसनबाट बाहिरिएपछि पहिलो पटक सार्वजनिक अन्तर्वार्ता दिँदै उनले पार्टी अध्यक्ष पदका लागि आफ्नो आकांक्षालाई प्रस्ट पारेकी हुन्, जसले एमालेको भावी नेतृत्व र शक्ति सन्तुलनबारे गम्भीर बहस सिर्जना गरेको छ ।
बिहीबार एक टेलिभिजन अन्तर्वार्तामा भण्डारीले आफू एमालेको साधारण सदस्य बनिसकेको र आफ्नो लक्ष्यबारे पार्टी अध्यक्ष केपी शर्मा ओलीलाई जानकारी गराइसकेको बताइन् ।
‘एमालेको नेतृत्व लिनकै लागि राजनीतिमा फर्किएको हो ? भन्ने पत्रकार जगदीश खरेलको सीधा प्रश्नमा उनले दृढतापूर्वक जवाफ दिइन्, ‘त्यसमा कुनै सन्देह छ र ?’ उनको यो एक वाक्यले नै एमालेभित्र नेतृत्व हस्तान्तरणको मुद्दालाई सतहमा ल्याइदिएको छ ।
झापामा एमाले नेतृहरुसँग छलफल गर्दै पूर्व राष्ट्रपति विद्यादेवी भण्डारी ।
ओलीको उत्तराधिकारीको खोजी कि सीधा चुनौती ?
भण्डारीले अध्यक्ष ओली अब पुनः अध्यक्ष पदमा नदोहोरिने विश्वास व्यक्त गरेकी छन् । ‘मैले चिनेको केपी ओली एउटै कक्षाको जाँच दोहोर्याएर दिने व्यक्ति होइन’, उनले भनिन्, ‘उहाँले अब नयाँ पुस्ता वा टिमकै कसैलाई नेतृत्व हस्तान्तरण गर्नुहुन्छ भन्ने मेरो विश्वास छ ।’
यद्यपि, उनको यो भनाइले ओलीलाई सम्मानजनक बहिर्गमनको बाटो देखाउँदै आफूलाई स्वाभाविक उत्तराधिकारीको रूपमा प्रस्तुत गर्ने रणनीतिको सङ्केत गर्छ ।उनले अध्यक्ष ओलीसँग आफ्नो निर्णयबारे निरन्तर संवाद भइरहेको र ओलीले यसलाई सकारात्मक रूपमा लिएको दाबी गरेकी छन् ।
तर, यसले एमालेको आगामी ११ औँ महाधिवेशनमा नेतृत्वका लागि कस्तो प्रतिस्पर्धा हुनेछ भन्ने कौतुहलता बढाएको छ ।
प्रधानमन्त्री पदका लागि पनि खुला
भण्डारीको राजनीतिक महत्त्वाकांक्षा पार्टी अध्यक्षमा मात्र सीमित छैन । दुई कार्यकाल राष्ट्रपति भइसकेको व्यक्ति अब प्रधानमन्त्री बन्न खोजेको हो भन्ने प्रश्नमा उनले आफू सबै विकल्पका लागि खुला रहेको बताइन् ।
‘पूर्वराष्ट्रपतिले पाउने सबै सुविधा त्यागेर राष्ट्रिय आकांक्षा पूरा गर्न आएकी हुँ । देशलाई जे गर्दा राम्रो हुन्छ, त्यही गर्ने हो’, उनको यो भनाइले उनी देशको कार्यकारी प्रमुखको भूमिकामा समेत आफूलाई उभ्याउन तयार रहेको देखाउँछ ।
आलोचनाहरूलाई ठाडो अस्वीकार
पूर्वराष्ट्रपति जस्तो सम्मानित पदमा बसेको व्यक्ति सक्रिय दलीय राजनीतिमा फर्किँदा पदको गरिमा घट्ने भनी भइरहेका आलोचनाहरूलाई उनले ठाडै अस्वीकार गरिन् । आफू नेपालको एक नागरिक भएको र लोकतन्त्रमा कुनै पनि नागरिकलाई राजनीति गर्ने अधिकार हुने तर्क गर्दै उनले भनिन्, ‘अहिले राजतन्त्र होइन, यो लोकतन्त्र हो । यस्ता कुरा गर्नु फुर्सदको विषय हो ।’
समग्रमा, भण्डारीको यो घोषणाले एमालेभित्र मात्र नभई राष्ट्रिय राजनीतिमै नयाँ तरंग पैदा गरेको छ । यसले एमालेको आगामी महाधिवेशनलाई रोचक बनाउने निश्चित छ भने भावी राजनीतिक समीकरणमा समेत यसको प्रभाव देखिनेछ ।
